જય આદિવાસી / જય ચૌધરી સમાજ

સદીઓથી પ્રકૃતિ સાથે તાલ મિલાવીને જીવવું, મહેનતકશ બનવું અને પોતાના સંસ્કારો તથા પરંપરાઓને જીવંત રાખવી - આ આપણા ચૌધરી સમાજની આગવી ઓળખ છે. આપણો ઇતિહાસ બહાદુરી, પ્રામાણિકતા અને સામાજિક એકતાની સુવર્ણ ગાથાઓથી ભરેલો છે. સમય બદલાયો છે, પેઢીઓ બદલાઈ છે, પરંતુ આપણાં મૂળ અને આપણી સંસ્કૃતિ પ્રત્યેની આપણી નિષ્ઠા અકબંધ રહી છે.

ચૌધરી જ્ઞાતિ સુધારક સમાજની વર્ષ ૧૯૦૩માં રચના કરવામાં આવેલ હતી ત્યારથી પરંપરાગત રીતિ-રિવાજોમાં તબક્કાવાર સુધારા-વધારા કરવામાં આવતા રહ્યા છે. છેલ્લે વર્ષ ૧૯૪૭ના સુધારા પછી આ વારસાને જીવંત રાખવા અને આગળ ધપાવવા માટે વર્ષ ૨૦૦૭માં “દક્ષિણ ગુજરાત સમસ્ત ચૌધરી સમાજ ચેરિટેબલ ટ્રસ્ટ ફેડરેશન''ની રચના કરવામાં આવી અને NGO તરીકે રજિસ્ટ્રેશન કરાવીને સામાજિક ઉત્થાનની સેવાકીય પ્રવૃત્તિઓ કરવામાં આવી રહી છે.

સમાજનાં યુવક-યુવતીઓને શૈક્ષણિક માર્ગદર્શન, તાલીમ, સ્પર્ધાત્મક પરીક્ષાની તૈયારીઓ, લાઇબ્રેરીની સુવિધા, યુવક-યુવતી જીવનસાથી પસંદગી મેળો, સમૂહ લગ્નનું આયોજન, મેડિકલ કેમ્પ, બ્લડ ડોનેશન કેમ્પ, તેજસ્વી વિદ્યાર્થીઓનું સન્માન, રમત-ગમત સ્પર્ધાનું આયોજન, પ્રતિષ્ઠિત નાગરિકોનું સન્માન, વૃક્ષારોપણ, ખેડૂત શિબિર, વ્યસનમુક્તિ સેમિનાર, દેવ-હરખીપૂજા, શૈક્ષણિક સહાય, કુદરતી આપત્તિમાં સહાય જેવી સમાજની સંસ્કૃતિના જતન સાથે ઉત્કર્ષ થાય તેવી નિયમિત રીતે પ્રવૃત્તિઓ કરવામાં આવે છે.

આજે જ્યારે ગુજરાત અને દેશ-વિદેશમાં વસતો આપણો સમાજ પ્રગતિનાં શિખરો સર કરી રહ્યો છે ત્યારે આપણી આવનારી પેઢીઓને આપણા ગૌરવવંતા વારસા સાથે જોડી રાખવાની સાથે સાથે તેમને આધુનિક યુગમાં આગળ વધારવાની જવાબદારી આપણા સૌની છે. આ જ પવિત્ર ઉત્તરદાયિત્વના ભાગરૂપે, સમાજ ભવનના પ્રતીક તરીકે “આદિ પ્રકૃતિ સંકુલ''ના નિર્માણનું એક ભવ્ય, દૂરદર્શી અને બહુપયોગી આયોજન હાથ ધરવામાં આવ્યું છે.

"આદિ પ્રકૃતિ સંકુલ'' અંતર્ગત આયોજિત સુવિધાઓ:
કોચિંગ સેન્ટર, અદ્યતન લાઇબ્રેરી અને કમ્પ્યુટર લેબ: GPSC, UPSC, GSSSB, NEET, JEE અને પંચાયત સેવા જેવી વિવિધ સ્પર્ધાત્મક પરીક્ષાઓ માટેનું તાલીમ અને માર્ગદર્શનની ઉત્તમ સુવિધાઓનું આયોજન.

આધુનિક ખેતી, યુવાન ઉદ્યોગ સાહસિકો અને વેપારીઓને માર્ગદર્શન, નેટવર્કિંગ અને વ્યાવસાયિક વેગ પૂરો પાડવા માટેનું ખાસ કોમ્યુનિટી વ્યવસાય કેન્દ્ર.

સમાજના સભ્યોની આર્થિક સદ્ધરતા માટે સહકારી ધોરણે બચત, ધિરાણ અને આર્થિક સહાય મળી રહે તેવી સહકારી મંડળીઓનું આયોજન.

આપણા પૂર્વજોની જીવનશૈલી, લોકકળા અને ઇતિહાસનું જીવંત સંગ્રહસ્થાન સાથે સાંસ્કૃતિક ધરોહરનું જતન.

સામાજિક પ્રસંગો, સમૂહ લગ્નોત્સવ અને પરિચય મેળા માટેની અત્યાધુનિક સુવિધાઓ.

પોલીસ, વન વિભાગ તથા આર્મી જેવી સ્પર્ધાત્મક શારીરિક કસોટીની તૈયારી માટે રનિંગ ટ્રેક સહિતની સુવિધાઓ.

સંકુલના મરામત અને નિભાવણી તથા ભવિષ્યની નવી સુવિધાઓ માટે ઉપરોક્ત સુવિધાઓમાંથી આવકના સ્ત્રોત માટેનું આયોજન.


આદિ પ્રકૃતિ સંકુલ નિર્માણના આ ભગીરથ કાર્યમાં આપનું યોગદાન અનિવાર્ય છે.
કોઈપણ મહાન કાર્ય એક વ્યક્તિના પ્રયાસથી થતું નથી, પણ સમૂહની તાકાતથી સિદ્ધ થાય છે. સમાજના દરેક વર્ગના ઉત્થાન અને ઉજ્જવળ ભવિષ્ય માટેનું આ નિર્માણ કાર્ય ત્યારે જ પૂર્ણ થઈ શકશે જ્યારે તેમાં સમગ્ર ચૌધરી સમાજનું હૈયું અને હાથ એકસૂત્રે જોડાઈ જશે.


આદિ પ્રકૃતિ સંકુલ પરિવાર આ પવિત્ર યજ્ઞને પાર પાડવા માટે સંપૂર્ણપણે કટિબદ્ધ છે, પરંતુ આ ભગીરથ કાર્ય આપ સૌના સક્રિય સાથ, સહકાર અને આશીર્વાદ વિના અધૂરું છે. સમાજના રાજકીય આગેવાનો, સામાજિક આગેવાનો, ખેડૂતો, સહકારી ક્ષેત્રોના આગેવાનો, ડૉક્ટર્સ, એન્જિનિયરો, પશુપાલકો, સરકારી-અર્ધ સરકારી તથા ખાનગી ક્ષેત્રમાં નોકરી કરતા અને નિવૃત્ત અધિકારીઓ તેમજ વિદેશમાં વસતા સમાજબંધુઓ સહિત સમાજના તમામ પ્રબુદ્ધ નાગરિકોને આપણી ભાવી પેઢીના ઉજ્જવળ ભવિષ્યને વેગવંતુ બનાવવા માટેના આ ભગીરથ કાર્યમાં આપને ઉદાર મને આર્થિક સહયોગ આપવા હૃદયપૂર્વક નમ્ર અપીલ છે.

“આપેલું દાન ક્યારેય એળે જતું નથી તે સમાજનું ભવિષ્ય ઉજ્જવળ અને આત્મનિર્ભર બનાવે છે.”

આવો આપણે સૌ સાથે મળીને આપણા ગૌરવવંતા ઇતિહાસને અનુરૂપ એક ભવ્ય “આદિ પ્રકૃતિ સંકુલ''નું નિર્માણ કરીએ અને સમાજની એકતા તથા પ્રગતિનો નવો ઇતિહાસ રચીએ.

આપના સહકારની અપેક્ષા સાથે, આદિ પ્રકૃતિ સંકુલ પરિવાર